ئاژانسه‌كان : یانه‌ى ئینته‌رمیلان به‌رده‌وامه‌ له‌سه‌ر بردنه‌وه‌كانى و میلانیش ریزبه‌ندی دوه‌می خولی ئیتاڵی بۆ رۆما چۆڵكرد.

  له‌ میانه‌ی یاریه‌كانى هه‌فته‌ى 23 ى خولى تیپه‌ پله‌ یه‌كه‌كانى ئیتاڵیادا یانه‌ى ئینته‌رمیلان ى یه‌كه‌مى ریزبه‌ند له‌ یاریگاى جۆزیپى میاتزا و به‌ ئاماده‌ بوونى 50 هه‌زار هانده‌ر میواندارى یانه‌ى گالیارى هه‌شته‌مى ریزبه‌ندی كرد ،  دواى تیپه‌ر بوونى ته‌نها 6 ده‌قیقه‌ به‌سه‌ر یاریه‌كه‌ گۆران پاندیف تۆرى گۆڵى تیپى میوانى هه‌ژاند و یه‌كه‌م گۆڵى ئینته‌رى تۆمار كرد ،له‌ ده‌قیقه‌ى 20 یشدا والته‌ر سامۆئیل دووه‌م گۆڵى ئینته‌ر ی كرد و ئه‌و گێمه‌ به‌ پێش كه‌وتنى ئینته‌رمیلان كۆتایى هات ، له‌ گێمى دووه‌میشدا دیگۆ ئه‌لبرتۆ میلیتۆ هێرش به‌رى ئه‌رجه‌نتینى سێیه‌م گۆڵى ئینته‌ر و كۆتایى یاریه‌كه‌ى كرد ،  به‌و بردنه‌وه‌یه‌ش ئینته‌رمیلان به‌ 52 خاڵ  جێگاى خۆى له‌ پێشه‌نگى ریزبه‌ندیدا قایمتر كرد .
له‌ یاریگاى ریناتۆ دل ئارا ش یانه‌ى ئه‌ى سى میلان ى دووه‌مى ریزبه‌ند بووه‌  میوانى یانه‌ى بۆلۆنیاى 14 یه‌م یانه‌ى میلان كه‌ چه‌ند هه‌قته‌یه‌كه‌ له‌ به‌ده‌ست هێنانى 3 خاڵى یاریه‌كانى سه‌ركه‌وتوو نه‌بووه‌ له‌م یاریه‌شدا له‌و ئاسته‌ چاوه‌روان كراوه‌یدا نه‌بینرا و دواى 90 ده‌قیقه‌ یارى كردن یاریه‌كه‌ به‌  بێ تۆمار كردنى گۆڵ كۆتایى هات ، به‌و یه‌كسان بونه‌ش میلان به‌ 42 خاڵ  دابه‌زییه‌ پله‌ى سێیه‌مى ریزبه‌ندى خوله‌كه‌، ئه‌مه‌ش دوای ئه‌وه‌ی دوا یارى هه‌فته‌ى 23 ى خولى تیپه‌ پله‌ یه‌كه‌كانى ئیتاڵیا  له‌ نیوان هه‌ردوو یانه‌ى رۆماى سێیه‌مى ریزبه‌ند و فیۆره‌نتیناى 10 یه‌مدا كرا ، یه‌كسان بونى یانه‌ى ئه‌ى سى هه‌لێكى باشى خسته‌ به‌رده‌م یانه‌ى رۆما تا به‌ بردنه‌وه‌ى له‌م هه‌فته‌یه‌دا  بۆ جارى یه‌كه‌م له‌م وه‌رزه‌دا خۆى بگه‌یه‌نێته‌ پله‌ى دووه‌مى ریزبه‌ندى هه‌رچه‌نده‌ یانه‌ى رۆما له‌ ده‌ره‌وه‌ى یاریگاى خۆى به‌رامبه‌ر به‌ یانه‌ى فیۆره‌نتینا یارى ده‌كرد به‌ڵام له‌  به‌ده‌ست هینانى 3 خالى یاریه‌كه‌ بێ هیوانه‌ بوون و له‌ ده‌قیقه‌ى 82 دا بۆسنیچ تاكه‌ گۆڵى یاریه‌كه‌و یانه‌ى رۆماى كرد و 3 خاڵى گرنگى بۆ تیپه‌كه‌ى به‌ده‌ست هێنا ،  به‌و بردنه‌وه‌یه‌ش یانه‌ى رۆما كۆى خاڵه‌كانى كرده‌ 44 خاڵ و بۆ پله‌ى دووه‌مى ریزبه‌ندى خوله‌كه‌ سه‌ركه‌وت.
ئه‌نجامی سه‌رجه‌م یاریه‌كانی هه‌فته‌ی 23ی خولی ئیتاڵی به‌م جۆره‌ بوو:
ئه‌ته‌لانتا 1-0 باری
لازیۆ 0-1 كاتانیا
ئۆدۆنیزی 3-1 ناپۆلی
سێینا 1-2 سامپادۆریا
جه‌نه‌وا 1-0 كیڤۆ ڤیرۆنا
لیڤۆرنۆ 1-1 یۆڤانتۆس
بالێرمۆ 2-1 پارما
ئینته‌ر 3-0 كالیاری
بۆلۆنیا 0-0 میلان
فیۆره‌نتینا 0-1 رۆما
ریزبه‌ندی یه‌كه‌م تا پێنجه‌می خوله‌كه‌ش به‌م جۆره‌یه‌:
1- ئینته‌ر  52 خاڵ .
2- رۆما 44 خاڵ .
3- میلان 42 خاڵ.
4- ناپۆلی 38 خاڵ .
5- بالێرمۆ 37 خاڵ .
نوسه‌ر : بێوه‌ی ئه‌حمه‌د